في يوم قالوا نسيتك منشان
يشوفوا ان كني بعدني عشقان
قلتلهم كرمال الله يا بشر
خبروني إسمها شو كان
نسيت شو ناسي و على لساني
كنت فاكِر شو أنـا نسيان
كل شي النسيان نسّاني
إلا كلام الغزل للنسوان
يا رِحلة النسيان.. نسيني
حب اندفن لكن بِقي فيني
ذكرى أليمة في قلب مجروح
نسيتها و بقيت مع سنيني
بتذكرك قديش كنا نلتقي
لكن بعد ما تعوكر الحب النقي
بوقف عشاطي الذكريات و قول
لا بد إلا يوم نِـرجع نلتقي
الناس ما بين الأمس و اليوم
بتبين الأصلي من المغشوش
ناس بتحافظ عليك بدَوم
و ناس بتبيعك بخمس قروش
---------------------------------------
ناطر عشط البحر و الذكرى سوى
يمكن حبيبي يهب في قلبه الهوى
و كلما تجي عالشط موجة و راجعة
فتِّش بداخلها حبيبي شو نوى
رسمتك بعقلي ان كان بعدك ذاكره
و جوات قلبي طبعتها لو فاكره
كيف إنساكي و بقلبي ساكنه
و صورة إلك ما بتنمحي من الذاكره
الظاهر ما عندك بالمحبة إلتزام
بسرعة نسيتي الشوق و ليالي الغرام
نسيتي ع ضَو القمر شو حكينا كلام
نسيتي ليالي عاطفية و إنسجام
نسيتي و عدقات القلب كنا ننام
عشاق نجمات السما علينا حْـرَام
نسيتي قلب مليان أشواق و حنين
و اتبعتي جـَيـبـة ولاد الحَـرام
الشاعر… د.علي مسلم عجمي
لبنان
ليست هناك تعليقات:
إرسال تعليق