ولأمتى يا دنيا يزيد وجعي
والحزن يسطَّر كراسي
ده كتابي من الحزن بيبكي
صفحاته مواجع ومآسي
وبذاكر فيه طول أيَّامي
لكنْ لصعوبته بأقوم ناسي
أنا قلت هسكَّر باب بيتي
م الصبح راح أقفل ترباسي
ما سلمتش م الناس وكلامها
وحكاوي بتجرح إحساسي
قالوا ده برَّاوي... ده مخاوي
بيقولوا كمان واكل ناسي
أنا شلت الصبر على كتافي
وخلاص مش قادر...فاض بيه
والفرج إن جه يفتح بابي
هيفوت... ويعديه بشويه
الدنيا دي سوق وأنا جواها
حبة كراكيب بتبيع فيه
وبضاعة كمان مش عجباها
جري إيه يا زمان حن عليه
ده أنا داير في سواقي حزينة
وغمامة سودة على عنيه
الدنيا خلاص مفيهاش رحمة
والشُّوك بيمزَّع رجليه
ماشي باتَّعطر في همومي
مش لاقي شوية حنية
وأتاري البير فيه أحزاني
وباعبي وفاكر فيه مية
أمتى هتتصالح أيامي
وتهدي بقى اللعب شوية
ليست هناك تعليقات:
إرسال تعليق